Horatio's Garden Cymru

Gwyliwch ein Fideo newydd am Apêl Cymru Horatio’s Garden drwy glicio ar  ‘Chwarae’ yn y ffotograff ar y dde 

Mae Canolfan Cymru ar gyfer Adsefydlu yn dilyn Anaf i Fadruddyn y Cefn yn  un o 11 o ganolfannau penodedig ar gyfer yr asgwrn cefn yn y DU. Mae’n derbyn cleifion o Dde a Chanolbarth Cymru, Swydd Gaerloyw, Gwlad yr Haf, Dyfnaint a Chernyw, ond rhoddir blaenoriaeth i gleifion o Gymru.   

Mae’r ganolfan wedi’i lleoli yn Ysbyty Rookwood ar hyn o bryd, ond bydd yn cael ei symud i Ganolfan Asgwrn Cefn a Niwrolegol newydd bwrpasol yn Ysbyty Athrofaol, Llandochau. Disgwylir i’r ganolfan hon agor yn 2021, ac fel rhan o’r ailddatblygiad, mae Horatio’s Garden wedi cael gwahoddiad i greu gardd newydd i’r cleifion.  

Cynhelir y prosiect hwn ar y cyd â Bwrdd Iechyd Prifysgol Caerdydd a’r Fro, a chaiff chostau’r gwaith paratoi a hwyluso eu talu gan Elusen Iechyd Caerdydd a’r Fro. Bydd y ganolfan newydd yn darparu gwasanaeth arbenigol i gleifion ag anafiadau i’r asgwrn cefn a gwasanaeth niwroadsefydlu arbenigol. Bydd hefyd yn cynnwys cyfleuster byw yn annibynnol i gleifion sy’n paratoi i fynd adref. Bydd cyfanswm o 50 o welyau yn y ganolfan.  

“Rwy’n credu yn gadarn y bydd yr Ardd o fudd enfawr i’n cleifion yn gorfforol ac yn seicolegol. Rwyf hefyd yn sicr y bydd ein staff, sy’n gwneud gwaith mor wych yn gofalu am eu cleifion, hefyd yn cael budd o’r amgylchedd y bydd yr Ardd yn ei ddarparu. Rydym ni ym Mwrdd Iechyd Prifysgol Caerdydd a’r Fro yn edrych ymlaen yn arw iawn at agor Horatio’s Garden yn Llandochau maes o law”. – Yr Athro Charles Janczewski, Cadeirydd Bwrdd Iechyd Prifysgol Caerdydd a’r Fro Dros dro  

Lansiwyd Apêl Cymru gennym yn hydref 2019, gyda’r nod o godi’r £920,000 roedd ei angen o fewn blwyddyn. Yn anhygoel, mae gwahanol gefnogwyr eisoes wedi ein helpu i godi dros 80% ar gyfer y prosiect, ond byddwn yn parhau i godi arian mewn nifer o ffyrdd i gael y swm sy’n weddill. Ar gais yr ysbyty, mae cynllun a chyllideb yr ardd yn cynnwys ardal i’r cleifion ar y ward adsefydlu niwrolegol. Ni fydd modd mynd o un ardal o’r ardd i’r llall o ganlyniad i anghenion y cleifion a fydd yn eu defnyddio, sy’n wahanol iawn.  Mae Bwrdd Iechyd Prifysgol Caerdydd a’r Fro wedi addo talu’r gyfran o’r costau cyfalaf sydd ei hangen ar gyfer yr ardd niwrolegol a’r costau rhedeg parhaus.  

Gyda’ch cefnogaeth chi, rydym yn gobeithio dechrau adeiladu’r ardd yn 2020, fel y bydd yn barod i gleifion a’u hanwyliaid ei mwynhau erbyn haf 2021.  

“Pan glywais i fod Horatio’s Garden yn mynd i gael ei adeiladu’n bwrpasol yng Nghymru yn Ysbyty Llandochau, roedd yn anodd i mi gyfleu fy nheimladau. Rwy’n gwybod o’m profiad fy hun beth mae’n ei olygu i allu mynd allan i deimlo’r awyr iach. Roedd gallu bod gyda fy nheulu i ffwrdd o’r amgylchedd clinigol yn help mawr i mi wrth adsefydlu. Bydd yn wych cael gardd bwrpasol, sy’n ystyried yr holl fanylion bach er mwyn sicrhau bod pobl â symudedd isel yn gallu ei defnyddio’n hawdd.” – Rhian, cyn-glaf Canolfan Cymru ar gyfer Adsefydlu yn dilyn Anaf i Fadruddyn y Cefn  

I ddarllen mwy am ein hapêl i godi cyfalaf tuag at Horatio’s Garden Cymru, cliciwch ar y ddolen ganlynol: Taflen Apêl Caerdydd  

I gefnogi’r apêl, rhowch arian drwy glicio’r botwm yng nghornel dde uchaf y dudalen hon. Neu, gallwch anfon rhodd drwy’r post i gyfeiriad y swyddfa gofrestredig: 2 Throope Down Office, Blandford Road, Coombe Bissett, Salisbury, SP5 4LN, neu ffoniwch 1722 326834 i roi gyda cherdyn credyd. 

Os byddwch o’r farn y gallwch ein helpu i godi arian, neu os hoffech wirfoddoli, cysylltwch â ni drwy anfon e-bost i info@horatiosgarden.org.uk, neu ffoniwch 01722 326834.  

Diolch i bawb sydd wedi cefnogi chweched prosiect Horatio’s Garden hyd yn hyn.